8 sa Bawat 10 Sambahayan Apektado ng Food Insecurity

Food insecurity ang tawag sa kakulangan sa pagkain o kawalan ng kakayahan na bumili ng makakain. Ang mga sambahayan na nakakaranas ng ganito ay masasabing food insecure. Ayon sa datos ng Food and Nutrition Research Institute ng Department of Science and Technology (FNRI-DOST), 8 sa bawat 10 sambahayang Pilipino noong 2001 ang nakaranas ng kawalan ng kakayahang bumili ng makakain (maging food insecure). Isang adaptasyon ng Radimer/Cornell measure ang ginamit na sukatan ng food insecurity sa mga sambahayan sa loob ng 6 na buwan.

Ayon din sa surbey, mahigit 80% sa mga sambahayan ang nagsasabing kabilang ang kanilang mga maliliit na anak na nagdaranas ng kakulangan sa pagkain dahil sa walang sapat na perang pambili nito. Ang mga ito ay nangangamba na kulang sa sustansya ang mga pagkaing kaya lang nilang ibigay sa kanilang mga anak. Mahigit sa 85% sa mga sambahayang sumali sa surbey ang hindi nakayanang tustusan ng sapat ang kanilang pagkain at ang lalong masama, wala na silang perang pambili kapag naubos na ang pagkain.

Napag-alaman din sa pag-aaral na 33.5% ng mga anak ng mga sambahayang nakaranas ng food insecurity ay kulang sa timbang samantalang 38.5% naman ay kulang sa taas o maliit ayon sa kanilang gulang.

Ang food insecurity noong 2001 ay mataas sa lahat ng rehiyon. Mahigit 90% ng mga sambahayan sa Bicol, Eastern Visayas at Western Visayas ay nakaranas ng kakulangan ng pagkain. Ang rehiyong may pinakamababang porsyento ng food insecurity noong taong iyon ay ang Northern Mindanao, na may 72.5% na sambahayan na food insecure. Kung tutuusin, mataas pa rin ang problema ng food insecurity sa lahat ng rehiyon ng bansa.

Maraming bagay ang nagdudulot ng kakulangan sa pagkain. Para sa karamihan, malaki ang epekto ng mabilis na pagtaas ng presyo ng pagkain. Mahiwatigan sana ng mga tagapag-buo ng programa ukol sa pagsulong ng bansa na magtakda ng mga pagkakakitaan o mga pagkakataong makapagdaragdag sa kinikita ng mamamayan. Gayun din, makagawa sana ng mga paraan upang maibaba o mabawasan ang presyo ng pagkain.

Marami nang nangyari sa ekonomiya ng bansa mula noong 2001. Sa taong ito, muling isasagawa ng FNRI-DOST ang 6th National Nutrition Survey. Isa sa aalamin ng surbey ay ang kaugnayan ng sambahayang Pilipino ukol sa food security na maaaring na-impluwensiyahan ng mga pagbabago ng ekonomiya ng bansa.

Para sa karagdagang impormasyon sa resulta ng surbey, maaaring sumulat o tumawag sa: The Director, Food and Nutrition Research Institute-Department of Science and Technology, Gen. Santos Avenue, Bicutan, Taguig, Metro Manila, Tel/Fax Nos.: 8372934, 8373164; E-mail: cvcb@fnri.dost.gov.ph; o bisitahin ang FNRI-DOST website: http//www.fnri@dost.gov.ph.

S&T Media Service
FNRI-DOST Media Release for 2003