Mga Batang Kalye, Bigyan Halaga: Ayon sa mag Eksperto

Maraming bata ang nasa kalye. Ayon sa isang ulat, may naitalang 250,000 na batang kalye sa Pilipinas bago pumasok ang taong 2000. Araw-araw, ang mga batang ito ay nahaharap sa mga peligro ng kapaligiran na siyang sumusubok sa kanilang kakayahang mabuhay sa gitna ng kahirapan. Hubog ng panahon, pagkakataon at kapaligiran, ang mga batang ito ay natututong gumamit ng iba't ibang paraan upang mabuhay. Dito rin nakasalalay ang kanilang nutrisyon at kalusugan.

Sa isang pag-aaral ng Surian ng Pananaliksik sa Pagkain at Nutrisyon (Food and Nutrition Research Institute) ng Kagawaran ng Agham at Teknolohiya (Department of Science and Technology) noong taong 2000, sinuri ang mga paraan at katangian ng mga batang kalye na maaaring makaimpluwensiya sa kanilang pangkabuuang kalagayan sa nutrisyon.

Ayon sa pananaliksik na ito, napag-alamang ilan sa mga bagay na negatibong nakakaapekto sa kalagayang nutrisyon ng mga batang tulad nila ay ang mga sumusunod:

· ang mas mahabang oras na ginugugol sa lansangan upang kumita ng pera;
· ang pamumulot ng basura bilang pangunahing uri ng pinagkakakitaan;
· ang pagkakaroon ng mas malaking kita kaysa PhP 50.00 sa loob ng isang maghapong pagtatrabaho na maaari nilang gamitin sa ibang bagay bukod sa pagkain;
· ang paglalaan ng parte ng kanilang kita para sa pagsusugal na kung saan pumapangalawa lamang ang gastusing pang-pagkain; at
· ang mababang kalidad ng kanilang mga kinakain.

Dala ng matinding pangangailangan, ang mga batang kalye ay napag-alamang lumalapit sa mga kamag-anakan, kaibigan at sa mga tanggapang may ibinibigay na tulong tulad ng pagkain o pansamantalang tuluyan. Dahil sa kanilang kalagayan ay mas nakokompromiso sa paglala ng pangkabuuang kahirapan sa ating bansa na ayon sa estadistiko kung saan 33.7% ng pamilyang Pilipino ay mahirap, ang masusing pagbibigay ng solusyon sa problemang ito ay kinakailangan.

Inererekomenda ang pinag-ibayong suportang pangnutrisyon, pangkalusugan at pangkabuhayan na dapat ibigay sa mga batang kalye, ayon pa sa mga eksperto. Ang mga ahensiya ng gobyerno, non-governmental organizations (NGOs), paaralan, komunidad at pamilya ay nakikitang dapat nagkakaisa sa pagtulong sa mga batang kalye hanggang sa kalaunan ay maialis na sila sa lansangan at tuluyan na silang mamuhay nang malayo sa peligro. Ang pangalagaan ang kapakanan ng mga kabataan tulad ng pagbibigay ng karampatang pagkakataon upang sila ay mamuhay nang maayos ay makakatulong din sa kalaunan sa ating pamayanan at pangkabuuang ekonomiya.

Para sa karagdagang impormasyon maaaring sumulat o tumawag kay Director Corazon VC. Barba ng Food and Nutrition Research Institute, DOST Compound, General Santos Avenue, Bicutan, Taguig, Metro Manila o sa e-mail address na cvcb@fnri.dost.gov.ph; sa telefax bilang (02)837-2934 o (02)837-3164. Maaaring bisitahin din ang website ng FNRI sa http://www.fnri.dost.gov.ph.

S&T Media Release
FNRI Press Release for 2003