Naniniwala ang mga mambabatas ng Pilipinas na ang gatas ng ina ang pinakamainam para sa sanggol. Kung kaya ipinagtibay ng kongreso ng Pilipinas ang batas na Republic Act (RA) 7600 "The Rooming-In and Breast-feeding Act of 1992", mahigit ng isang dekada ang nakalilipas.

Ang rooming-in ay ang pagsasama ng ina at sangol sa isang silid sa halip na ilagak ang sanggol sa nursery room. Layunin ng rooming-in na mapasuso ni nanay ang kanyang sangol sa sandaling mangailangan ng gatas si baby.

Naniniwala tayo na karapatan ng bawat ina na pasusuhin ang kanyang sanggol at karapatan din ni baby na masuso ang gatas ng kanyang ina.
Ang unang daloy ng gatas ng ina ay tinatawag na colostrum. Manilaw-nilaw ang kulay nito, mayaman sa bitamina at antibodies na panlaban sa mikrobyo.
Iminumungkahi ng Food and Nutrition Research Institute, Department of Science and Technology (FNRI-DOST) na "Pasusuhin ang sanggol ng gatas ng ina lamang mula pagkasilang hanggang 6 na buwan at saka bigyan ng mga angkop na pagkain habang pinapasuso pa".

Napagalaman na ang gatas ng ina ay nagtataglay ng lahat ng sustansya na kailangan ng sanggol sa tamang kombinasyon sa unang anim na buwan.

Sapat din ang likido ng gatas ng ina upang matugunan ang pangangailangan ni baby kaya ang pagpapasuso ng tubig o pagbibigay ng tubig na may asukal at fruit juice ng mas maaga kaysa anim na buwan ay hindi iminumungkahi.

Tatlong palatandaan upang makasiguro na sapat ang gatas ng ina;

	Ang sanggol ay sumususo ng 15-20 minuto at nakakatulog ng mahimbing pagkatapos sumuso;
	Ang sangol ay umiihi ng hindi bababa ng 6 na beses sa isang araw;
	Patuloy na tumataas ang timbang ng sanggol. Napag-alaman na dumodoble ang birth weight ng sanggol makaraan ang anim na buwan at nagiging triple naman ito makalipas ang isang taon.

Para sa karagdagan detalye, maaaring sumulat kay Director Corazon VC. Barba sa sa email address cvcb@fnri.dost.gov.ph, o sa Food and Nutrition Research Institute, DOST Compound, Gen. Santos Ave., Bicutan, Taguig, Metro Manila, o tumawag sa numero (02) 837-29-43 o (02) 837-81-13 o bisitahin ang aming web site sa "http://www.fnri.dost.gov.ph.